Sarwar ko maartey hai aadaa rulaa rulaakey

Mazloom o beywatan ko pyaasa sataa sataakey

1) Boley Husain beta mujhko muaaf karna

Turbat teri banaata paani jo mujhko miltaa

Dafnaa rahaa hoon tujhko aansu bahaa bahaakey

2) Maasoom beyzubaa'n par ye zulm kardiyaa hai

Uskey bhi sarr ko aadaa naizey pey rakhdiyaa hai

Dafnaaya tha shah e dee'n jisko chupaa chupaakey

3) Beenaayi jaachuki hai nazro'n mey hai andhera

Aawaaz dey aye akbar aayega tera baba

Mai thak gayaa hoon beta tujhko bulaa bulaakey

4) Maidaan mey hai tanhaa khairunnisa ka dilbar

Imdaad ko wahaa'n par moonis hai aur na yaawar

Shabbir thak gaye hai laashey uthaa uthaakey

5) Aye shimr tu bataadey kuch to qataa hai shah ka

Khanjar hai kund uspar sookha galaa hai shah ka

Gardan kyu'n kaat'taa hai zarbey lagaa lagaakey

6) Naizey se girraha to phirsey usey chadaao

Ahley haram khuley sarr hai ye usey bataao

Abbas ko rulaao chaadar dikhaa dikhaakey

7) Maaro tamaachey mujhko ek sarr sinaa se bolaa

Soneydo meri bachi ko reyt par zaraa saa

Usko na tum jagaao daaman jalaa jalaakey

8) Majmaa sharaabiyo'n ka darbaar mey hai baithaa

Aur tasht mey hai rakkhaa Sarwar ka sarr bureeda

Aur hasrahey hai zaalim mehfil sajaa sajaakey

9) Kya guzri hogi us damm Zainab ke dil pey *"Gaazi"*

Baazaar mey na jaaney kis tarha seh rahi thi

Hastey they shaami shah ko baagi bulaa bulaakey