Haaye...

jab aai shaam ki basti me (nange sar zainab)..(2)

aseer o muztar o betaabo (nauhagar zainab)..(2)

mu'n apna baalo'n se dhaanpe thi u'nth par zainab

ye roke kehti thi har dam ba chashme tarr zainab

haaye...

behen husain ki hu'n fatima ki jaayi hu

mai karbala e mualla se lutke aayi hu

1. Ujaad maariya me kho gaya chaman mera

bichhad gaya ali akbar sa gulbadan mera

hua shaheed har ek sher sa shikan mera

lahu rulata hai khud mujhko ye sukhan mera

haan...

2. Sakina bibi ne tab haath jod kar ye kaha

sina se dekho to ye zulm ye sitam baba

phuphi ke nauhe se dil hota hai taho baala

ke shaam walo ne mujhko nhi hai pehchana

haan...

3. Na koi raah me aaram hai na soti hu

tadapti rehti hu behaal ghum se hoti hu

ghame faraaq me mu'n aansuo'n se dhoti hu

ye bayn karti hu aur subh o shaam roti hu

haan...

4. Nahaar oonto ki thaame hai abid e muztar

kahi'n se aag barasti hai aur kahi'n patthar

aseere tauq salasil hai kya kare yaawar

wo mar na jaaye kahin mera marsiya sunkar

haan...

5. Ye baat shaam ke logo ko kya khabar na hui

ke ye jo oonto'n pe aaye hai sar khule qaidi

falak nasheen hai in qaidiyon me har bibi

khudara shaam ke logo ko ye bataye koi

haan...

6. Suna hai hoga ta'arruf abhi yaha'n mera

zamee'n chupa le mujhe ya utha le mujhko khuda

na sun sakungi shaqi ki zabaa'n se naam apna

sunu bhi kaise gawara lahu nahi karta

haan...

7. Zamee'n dabeer ki tazmeen hai ye mazhar ki

fughaa'n labo pe hai irfan ghum ke manzar ki

azaan e ranjo alam hai ye qalbe muztar ki

sadaa rulaegi ta hashr binte haider ki

haan...