Ummat se pareshaan muhammed ki Dulaari
Karti thi jigar tham ke bus girya o zari
Hasnain ko dekha kabhi haider ko pukari
Yeh Gham dil e zehra ke liye kitna tha bhari
Ankhoon mai dehekte hue ashko ki ladi thi
Be sakata mohsin jo mara cheekh padhi thi
Darmiyaan E Dar O Deewaar Pisi Hain Cheekhein
Ashk Ban Kar Kabhi Aankho'n Se Bahi Hain Cheekhein
Reza Reza Kahi Ik Phool Ka Bikhra Hai Wujood
Dheere Dheere Kisi Goshe Se Uthi Hain Cheekhein
Dhoondh kar dekh zara raakh mei mil jaayegi
Jalte darwaaze k hamraah jali hai cheekhein
Pasliya Chatkhi Thi Jis Lamhe Me Seydaani Ki
Usi Ik Lamhe Ki Sadyo'n Ne Suni Hain Cheekhein
Ho gaya larza bar-andaam moarrikh ka Qalam
Itni tareekh k kaanoN mei basi hain cheekhein
Jaise gir ke kahi taaza lahoo jamm jata hai
Daaman e waqt pa is tarha jamee hain cheekhein
Abr E Gham Toot Ke Barsa Hai Shikasta Dil Par
Tab Kahi Jaake Bahaaro Ki Thami Hain Cheekhein
Zakhm E Taaza Pa Naye Zakhm Ka Marham Rakh De
Abhi Zinda Hu Main Kuch Baaqi Abhi Hain Cheekhein
Zulm Ne Jinko Madeene Me Dabaana Chaha
Saare Aalam Me Wahi Goonj Rahi Hain Cheekhein
Uska Gham Nazr E Qalam Kar To Diya maine nadeem
Mere Har Lafz Ke Pehloo Se Uthi Hain Cheekhein