Sar Jhukaye Ro Rahi Hain Fatima-e-Darbar Mein
Kaun Hai Jo De Dilaasa Majma-e-Aghyar Mein
Cheen Ke Baagh-e-Fadak Zahra Ko Jhutlaya Gaya
Majme Mein Na-Mahramon Ke Haaye Bulwaya Gaya
Reh Gaya Gham Qalb-e-Binte Ahmad-e-Mukhtar Mein
Uthte The Jiske Liye Masnad Se Apni Khud Nabi
Baithe Hain Saare Musalman, Bint-e-Ahmad Hain Khadi
Sayyida Par Zulm Ye Kya Ho Gaya Darbar Mein
Aag Thi, Sholay Bhadakte Aur Dhuan Tha Chaar Soo
Aur Pas-e-Dar Ahle Baatil Kar Rahe The Guftagu
Ghurbat-e-Zahra Chhupi Hai Un Dar-o-Deewaar Mein
Zakhmi Pehlu Ko Chhupaati Thi Shahe Abrar Se
Shab Mein Roti Thi Woh Chhup Kar Haider-e-Karrar Se
Yeh Haqeeqat Thi Ayaan Bas Fiza-e-Ghar-Baar Mein
Pasliyon Ke Tootne Se Thi Aziyyat Dam-Ba-Dam
"Ya Ali" Keh Kar Ke Zahra Rakh Rahi Thin Har Qadam
Saans Bhi Lena Tha Mushkil Dard Aur Aazaar Mein
Darmiyan-e-Ghusl-e-Mayyat Ro Ke Yeh Bole Ali
Pasliyaan Tooti Hain Teri, Ae Nabi Ki Laadli
Kyun Chhupaaye Zakhm Mujh Se Manzil-e-Dushwaar Mein
Khoon Hai Aankhon Se Jaari Ab Talak Is Baat Par
Haaye Kya Guzre Masaib Maadar-e-Sadaat Par
Ghurbat-e-Zahra Raqam Kaise Karoon Ashaar Mein
Main Parhoon Kaise Turaab, Ab Dil Bohot Maghmoom Hai
Kal Bhi Thi Mazloom Bibi, Aaj Bhi Mazloom Hai
Turbat-e-Zahra Munawwar Ab Bhi Hai Aghyar Mein