haaye haaye

bar sare karbala

zakhmon se choor choor hai hussain

maan

dashte khuni me karti rahi ye bain

haaye haaye haaye

maan aa gayi hussain

jis roz watan chorh ke nikla tha meri jaan

nikli thi tere saath baqayya se teri maan

ehle jinaan bhi gham me huwe chaak girebaan

nana bhi tere khaak urhaate hain meri jaan

phatta hai kaleja haaye hussain

karte huwe noha haaye hussain

maan aa gayi hussain maan aa gayi hussain

bachpan me tere naaz uthaati thi teri maan

zaanu pe tujhe apne sulaati thi teri maan

khud bhuki reh ke tujh ko khilaati thi teri maan

aaghosh me jhula bhi jhulaati thi teri maan

ay naazon ke paale haaye hussain

ab ashk pilaane haaye hussain

maan aa gayi hussain  maan aa gayi hussain

kya haal laeenon ne kiya dekh rahi hun

mein pehli moharram se jafa dekh rahi  hun

hain tishna dahan aale aba dekh rahi  hun

hoton pe tere shukre khuda dekh rahi  hun

tu dasht me tanha haaye hussain

dene ko dilaasa haaye hussain

maan aa gayi hussain  maan aa gayi hussain

qaasim ke tukre maine samete hain tere saath

maqtal me saare laashe uthaaye hain tere saath

furqat ke zakhm maine bhi khaaye hain tere saath

gham tishnagi ke maine bhi paaye hain tere saath

jab zeen se gira tha haaye hussain

mein karti thi noha haaye hussain

maan aa gayi hussain  maan aa gayi hussain

aaya nahin zameen pe beta tera badan

us par sitam hai pyaas se sukha huwa dahan

manzar ye gham ka dekh rahi hai teri bahan

karti hai bain ay mere mazlum be watan

ye zulm jo dekha haaye hussain

zainab ne bulaaya haaye hussain

maan aa gayi hussain  maan aa gayi hussain

tere badan se teer nikaalegi teri maan

ab har qadam pe tujh ko sambhaalegi teri maan

in zaalimon se tujh ko chupaalegi teri maan

tere dukhon ka boj uthaalegi teri maan

tu kitna hai pyaasa haaye husssain

dene ko dilaasa haaye hussain

maan aa gayi hussain  maan aa gayi hussain

farhaan jo mazhar ne masaaib raqam kiye

rukte nahin hain aankhon se ashkon ke qaafle

jo bain sayyada ne sare dasht kiye the

lafzon ki shakl me sare qirtaas aagaye

kehti thi sayyada haaye hussain

ay laal na ghabra haaye hussain

maan aa gayi hussain  maan aa gayi hussain