Ali Ke Ghar Mein Barpa Hai Qayamat, Eid Se Pehle

Ali Ke Ghar Mein Barpa Hai Qayamat, Eid Se Pehle - 2

Hui Zainab Ke Baba Ki Shahadat, Eid Se Pehle

Ali Ke Ghar Se Le Kar Arsh Tak Bas Gham Ka Mausam Hai

Sabab Se Is Ke Ab Ramzan Bhi Mah-E-Muharram Hai

Lagi Hai Jo Sar-E-Haider Pe Zarbat, Eid Se Pehle

Janaza Uth Raha Hai Shah-E-Khaibar Geer Ka Logo

Na Poochho Haal Kya Hai Zainab-E-Dilgeer Ka Logo

Khushi Hasnain Ki Hoti Hai Gharat, Eid Se Pehle

Kaha Ashaab Ne Sar Peet Kar Hasrat Rahi Baqi

Imamat Mein Ali Ki Phir Namaz-E-Eid Parhne Ki

Qaza Ne Cheen Li Yeh Bhi Sa'adat, Eid Se Pehle

Dar-E-Zahra Jala Kar Bhi Hasad Ki Aag Baqi Hai

Humein Kya Thi Khabar Nana Sada Zainab Ki Aati Hai

Dobara Khum Ka Badla Legi Ummat, Eid Se Pehle

Ali A.S Ke Waste To Eid Masjid Mein Shahadat Thi

Mulaqat-E-Khuda Ki Is Qadar Haider Ko Thi Jaldi

Jaga Kar Khud Diya Qatil Ko Sharbat, Eid Se Pehle

Saf-E-Matam Bicha Do Sogwaro! Aaj Ghar Ghar Mein

Baha Do Apni Aankhon Ke Yeh Darya, Yaad-E-Haider Mein

Milegi Tum Ko In Ashkon Ki Qeemat, Eid Se Pehle

Ali Ko Halat-E-Roza Mein Maara Kalma Goyon Ne

Lahad Mein Bhi Muhammad Ko Sataya Kalma Goyon Ne

Rulaya Syeda Ko Zer-E-Turbat, Eid Se Pehle

Dua Maango Ke Raah-E-Hijr Mehdi Jald Khul Jaye

Ke Raaz-E-Inteqam Karbala Darvesh Khul Jaye

Mile Zeeshan Ko Bhi Yeh Basharat, Eid Se Pehle