Andheri Raat Hai, Bint-e-Nabi Ki Mayyat Hai
Khuda Ka Sher Hai, Bachche Hain Aur Ghurbat Hai
Laraz Rahi Hai Zameen, Aasmaan Rota Hai
Lehad Batool Ki Banti Hai, Ek Qayamat Hai
Ro Ro Ke Qabr-e-Zahra Haider Bana Rahe Hain
Ghurbat Pe Fatema Ke Aansoo Baha Rahe Hain
Ghurbat Hai, Bekasi Hai, Har Simt Hai Andhera
Ruk Ruk Ke Khodte Qabr-e-Batool Maula
Shabbir Aur Shabbar Mitti Hata Rahe Hain
Ghurbat Pe Fatema Ke Aansoo Baha Rahe Hain
Haider Ke Dil Pe Khanjar Sadmon Ka Chal Raha Hai
Lagta Hai Ab Ali Ka Bhi Dam Nikal Raha Hai
Yun Bailcha Zameen Ke Upar Chala Rahe Hain
Ghurbat Pe Fatema Ke Aansoo Baha Rahe Hain
Hoti Hai Aaj Larzish Khaibar Shikan Ke Tan Mein
Kaisa Ye Waqt Aaya, Quwwat Nahi Badan Mein
Uthte Nahi Hain Baazu, Lekin Utha Rahe Hain
Ghurbat Pe Fatema Ke Aansoo Baha Rahe Hain
Zahra Ki Pasliyon Ke Tukde Jab Se Dekha
Bheega Hai Aansuon Se Sher-e-Khuda Ka Chehra
Aankhon Se Ashk Gir Kar Seene Tak Aa Rahe Hain
Ghurbat Pe Fatema Ke Aansoo Baha Rahe Hain
Hai Aaj Murtaza Ke Upar Badi Qayamat
Qabr-e-Batool Inse Banwa Rahi Hai Qismat
Mitti Mein Sayyeda Ko Dafnaane Ja Rahe Hain
Ghurbat Pe Fatema Ke Aansoo Baha Rahe Hain
Bachchon Ko Maa Ki Soorat Dikha Rahe Hain Haider
Aur Aakhri Ziyarat Karwa Rahe Hain Haider
Rukh Se Kafan Hata Kar Chehra Dikha Rahe Hain
Ghurbat Pe Fatema Ke Aansoo Baha Rahe Hain
Hasnain Maa Ke Gham Mein Karte Aah-o-Zaari
Badhti Hi Ja Rahi Hai Dono Ki Beqaraari
Seene Se Laadlon Ko Maula Laga Rahe Hain
Ghurbat Pe Fatema Ke Aansoo Baha Rahe Hain
Maula Ne Sayyeda Ko Jab Qabr Mein Utaara
Mehboob-e-Kibriya Ko Rote Hue Pukaara
Haathon Ko Mustafa Ke Jis Dam Ali Ne Dekha
Sarkar-e-Do-Jahan Se Karne Laga Ye Naala
Ye Gham Kabhi Bhi Mere Dil Se Juda Na Hoga
Ummat Ne Fatema Ko Tadpa Ke Maar Daala
Lauta Raha Hoon Aaqa, Main Aapki Amaanat
Zahra Ko Zaalimon Ne Di Hai Badi Aziyat
Kaise Bayaan Karun, Mujh Mein Nahi Hai Himmat
Beti Se Pooch Lena, Khud Pasliyon Ki Haalat
Qismat-Nawaaz, Kaisi Manzil Pe Laake Aayi
Ro Ro Ke Qabr-e-Zahra Haider Ne Khud Banaayi
Lekin Nishaan-e-Turbat Khud Mita Rahe Hain
Ghurbat Pe Fatema Ke Aansoo Baha Rahe Hain