Roze pe mustafa ke udaasi si chayi hai

kunbe ko khoke zainab e nashaad aayi hai

arey, rokar pukari nana mai, faryaad laayi hu

mai chhod kar hussain ko jungle mein aayi hu

{Roze pe mustafa ke udaasi si chayi hai

kunbe ko khoke zainab e nashaad aayi hai}..(2)

1. Nana ajeeb sanaye humpar guzar gaye

ranjo alam ne gher liya hum jidhar gaye

nana khuda ke ghar me na humko amaa'n mili

bhai ne sheher chhod ke jungle ki raah li

2. Nana hamare ghar ka sab asbaab lut gaya

nana hamare sar pe na baaqi rahi rida

nana hazaar tarha jafa ki la'eeno ne

khaimo'n me haaye aag laga di la'eeno ne

3. Nana shaheed hogaye bhai ke jaa nesar

ek ek kar ke mar gaye ashaab zee weqaar

nana bala ke bann me qayamat ka rann pada

bhai se bhai, baap se beta bichad gaya

4. Nana zameen karbobala laal hogayi

qasim ki laash ghodo'n se pamaal hogayi

nana katake shaano ko abbas margaye

ghurbat me bhaijaan ko be aas kar gaye

5. Nana aseer bara the aur ek thi rasan

bandhe gaye the misle gunahgaar e khastatan

nana hum apne haal pe rote the baar baar

nana hamarae haal pe haste the badd sheyaar

6. Itne me ek shaami ne nana ghazab kiya

saydani ko kaneezi me usne talab kiya

hoti thi laakh zillate hum dekhte rahe

has has ke taaziyane sitam jhelte rahe

7. Nana tabaah hoke hum aaye hai shaam se

ek daaghe no sakina ka laaye hai shaam se

ab tak hai neel rassi ke shaano ko dekhlo

nana hamare tann pe nishano ko dekhlo

8. Zainab jo roke karti thi qabr e nabi pe bayn

tharra raha tha roza e sultan e mashraqayn

bus khatm kar nisaar ye ghum naak daastaan

roye hai is alam mein zamee'n aur aasmaa'n