Karbala mein jo khate fatima sughra aaya

padhke ye baat bohot shaah ko rona aaya

hashr mein hogi mulaqat hamari baba

arey ab na jee paaegi beemaar tumhari baba

Sughra ne likha baba, mushkil hai mera jeena

jab laut ke aaoge, haye meri qabr pe aajana

jab laut ke aaoge, meri qabr pe aajana

1. Jab doobta hai suraj, dil doobne lagta hai

veeran hai sab hujre, ghar qabr ke jaisa hai

hai mere muqaddar mein, tanhai mein marjana

jab laut ke aaoge, meri qabr pe aajana

2. Hai paas ajal mere, tum door ho sughra se

hasrat ye liye baba, jaati hu mai duniya se

kaandha to janaze ko, mumkin na huwa dena

jab laut ke aaoge, meri qabr pe aajana

3. Aata hai palat kar jab, pardes se ghar koi

maloom hai sughra ko, hoti hai thakan fir bhi

aye baba meri khatir, zehmat ye utha lena

jab laut ke aaoge, meri qabr pe aajana

4. Aakar meri turbat par, sab shamma jalaenge

aur bhai sirhane par, yaseen sunaenge

hojaega is tarha, aabad wo veerana

jab laut ke aaoge, meri qabr pe aajana

5. Ae kaash madine mein, wo paas mere rehta

sughra ke janaze par, ek bhai to ro leta

baba mere asghar ko, turbat meri dikhlana

jab laut ke aaoge, meri qabr pe aajana

6. Bhai ki mohabbat par, na harf koi aaye

maloom na ho unko, ye raaz hi reh jaaye

marne ka sabab meri, bhabhi ko na batlana

jab laut ke aaoge, meri qabr pe aajana

7. Rukh hoga lahad mein bhi, aye baba suwe qibla

mai qabr mein jaakar bhi, dekhungi tera rasta

acha mere vaade ko, tum yu hi nibha lena

jab laut ke aaoge, meri qabr pe aajana

8. Karti thi takallum wo, ye bayn qayamat ka

dastoor nahi hota, murde se mohabbat ka

amma ko magar baba, paigham ye pohchana

jab laut ke aaoge, meri qabr pe aajana