Ummat Se Aale Mohammad Ne Ye Ajr-E-Risalat Paya Hai
Yasrab Mein Kalma Goyo Ne Zahra (S.A.) Ke Dar Ko Jalaya Hai
1. Is Zulmo Tashaddud Se Haaye
Zakhmi Hai Seena-E-Risalat Ka
Markad Se Nabi Ye Poochte Hain
Kya Thi Meri Lakht-E-Jigar Ki Khata
Batao Zara Ae Musalmano, Kyun Aal Pe Mehshar Dhaya Hai
2. Aankhon Mein Ashkon Ka Dariya Hai
Har Waqt Labon Par Nauha Hai
Mohsin Ki Khata Kya Thi Logo
Ik Maa Ka Dil Ye Poochta Hai
Duniya Mein Aane Se Pehle Masoom Ka Khoon Bahaya Hai
3. Is Manzar Se Hoti Hai Ghutan
Ro Ro Kar Ye Kehte Hain Hasan
Kyun Zulmo Tashaddud Dhaate Ho
Kyun Daali Hai Gardan Mein Rasan
Kis Jurm Mein Kalma Goyo, Mere Baba Ko Qaidi Banaya Hai
4. Hai Jis Pe Naaz Sadaqaton Ko
Darbaar Mein Us Par Kya Guzri
Tehreer-E-Mohammad Ke Tukde
Chun Kar Ye Zahra (S.A.) Kehne Lagi
Darbaar Mein Jhoothon Ne Mil Kar Siddika Ko Jhutlaya Hai
5. Jis Dar Pe Payambar Jhukte The
Uthta Hai Dhuan Ab Us Dar Se
Zahra (S.A.) Se Chhina Baagh-E-Fidak
Aur Chhini Khilafat Haider Se
Zahra O Ali Ke Kunbe Par Ye Kaisa Ghamon Ka Saaya Hai
6. Maujood Ali Ke Hote Hue
Ye Kaisi Qayamat Aayi Hai
Chalti Hai Ghar Mein Asa Lekar
Baalon Pe Safedi Chhaayi Hai
Is Darja Bint-E-Ahmad Ko Kalma Goyo Ne Sataya Hai
7. Haalat Pe Ab Bhi Baqayya Ki
Markad Mein Risalat Roti Hai
Raaton Ko Andhera Hota Hai
Aur Dhoop Dino Ko Padti Hai
Zahra (S.A.) Ki Turbat Par Logo, Na Shamma Hai Na Saaya Hai
8. Ayyam-E-Aza-E-Zahra (S.A.) Par
Har Aankh Se Aansu Jaari Hai
Rizwan Ke Likhe Masaib Se
Is Darja Riq'at Taari Hai
Haathon Ko Seene Par Rakh Kar Farhan Ne Nauha Sunaya Hai