Zamee'n pe arshe mo'alla dikhai deta hai..(2)

ye ghar to kaabe ko kaaba dikhai deta hai

ye ghar butool ka hai..(4)

1. Namaz e madha ka unwaan hai butool ka ghar

har ek shaan mein zeeshan hai butool ka ghar

jaha'n ka markaze eemaan hai butool ka ghar

makaan e aayat e qur'aan hai butool ka ghar

ye kibriya ke liye zebo zayn ka ghar hai

makaan e zehra hasan aur husain ka ghar hai

2. Kamaal ghar hai yaha'n bakamaal rehte hai

misaal kya ke yaha'n bemisaal rehte hai

khayal e rabb ke sabhi hum khayaal rehte hai

janab e zehra ke zohra jamaal rehte hai

zamee'n pe arsh e mo'alla dikhai deta hai

ye ghar to kaabe ko kaaba dikhai deta hai

3. Hai is makaan ka darr karbala ka darwaza

kushada darr hai ye uqda kusha ka darwaza

yehi to darr hai shahe ambiya ka darwaza

dare rasool e khuda hai khuda ka darwaza

taharato'n ki mutahhir faza mein khulta hai

faqat ye darr hai jo bayte khuda mein khulta hai

4. Isi pe arsh e sitara utar ke aaya hai

yahi'n pe dee'n ka sahara utar ke aaya hai

kalaam e haq yahi'n saara utar ke aaya hai

yaha'n khuda ka utara utar ke aaya hai

falak ke waasi utar kar zamee'n par aate hai

farishte rotiya'n lene yahi'n par aate hai

5. Har ek khaak ka zarra nagee'n hai is ghar mein

falak se aala hai jitni zamee'n hai is ghar mein

har ek arsh nashee'n hum nashee'n hai is ghar mein

maka'n jo rakhta nahi wo makee'n hai is ghar mein

makaan aisa kaha'n hadde do jahaaan mein hai

nuseriyo'n ka khuda bhi isi makaan mein hai

6. Ye darr hayaat ka darr hai sifaat ka darr hai

makaan e zehra ka darr kayenat ka darr hai

ye darr dar asl had e mumkinaat ka darr hai

yehi to darr hai jo sabki nijaat ka darr hai

qadam yaha'n malakul maut ke ukhadte hai

isi pe ruk ke Mohammad(s.a.w.w.) durood padte hai

7. Bani hai aayat e qur'aa se iski deewarein

hai muntasil hade yazdaa'n se iski deewarein

baland aalam e imkaa'n se iski deewarein

mili hai rabb ke shabistaa'n se iski deewarein

bina makaan ki allah ke karam par hai

jaha'n se manzile kausain do qadam par hai

8. Balandiyo ki alamat hai is makaan ki chhat

hai past saamne is chhat ke aasmaan ki chhat

bayaan kaise ho ye wus'at e bayaan ki chhat

makaan e zehra ki ye chhat hai do jahaan ki chhat

isi ki chhao hai azmat ke aasmano par

ye chhat hai saaya figan paanch(5) saayebano par

9. Isi makaan mein allah ka habeeb bhi hai

isi makaa'n mein makee'n amn ka naqeeb bhi hai

qareeb e kaaba hai allah se qareeb bhi hai

isi makaan mein fitrus tera tabeeb bhi hai

tawaaf iska ye kul kayenaat karti hai

yaha'n kaneez bhi aayat mein baatein karti hai

10. Isi makaan ke darbaan meesam o salmaa'n

yahi'n pe noor ali deen e haqq hua hai jawa'n

yahi'n pe adna sa khidmat guzaar hai rizwaa'n

yahi'n kharidi hai haider ne marziye yazdaa'n

yahi'n pe dhalti hai shab din yahi nikalta hai

yaha'n pe chalti hai chakki to waqt chalta hai

ye ghar butool ka hai..(4)