Kar Rahi thi wasiyat ye tashna daha’n
Nam zami’n mein Banana Lahed Bhai ja’n
Payas se jal rahi hai meri haddiya’n
Nam zami’n mein banana Lahed Bhai ja’n
(1)
Gham zada Be sahara hoon nadan hoon
Mai yaha’n ke rivajo’n se anjaan hoon
Har Ghadi ke sitam se pareshan hoon
Kam sini mein musibat se hairan hoon
Jane kab khtm hoga mera imteha’n
Payas se jal rahi hai meri Haddiya’n
Nam zami’n mein……….
(2)
Gham uthane ki ab mujh mujh mein taqat nahi
Meri taqdeer mein koi Rahat nahi
Ab mujhe koi pani ki chahat nahi
Mujhko Ammu se koi shikayat nahi
Wo bhi tashna daha’n main bhi tashna daha’n
Payas se jal rahi hai meri haddiya’n
Nam zami’n mein …….
(3)
Haye kaisa sitam mujh pe dhaya gaya
Mujhko durre laga kar daraya gaya
Samne mere pani bahaya gaya
Ek qatra na mujhko pilaya gaya
Meri sans’o se uthta hai gham ka dhuwa’n
Payas se jal rahi hai meri haddiya’n
Nam zami’n mein…….
(4)
Dha rahe hain sitamgar sitam par sitam
Hai nayi ek musibat qadam dar qadam
Mujh mein taqat nahi Ab khuda ki qasam
Kya khabar hai nikal jaye kab mera dam
Mujhko laya hai mera muqaddar kahan
Payas se jal rahi hai meri haddiya’n
Nam zami’n mein……..
(5)
Be basi mera har dard kaheti rahi
Har emarat ummido’n ki daheti rahi
Har aziyat mai chup chap saheti rahi
Mai tadapti rahi naher baheti rahi
Yaad rakhna mere dard ki dastaa’n
Payas se jal rahi hai meri haddiya’n
Nam zami’n mein…….
(6)
Haye lachar ahele haram ho gaye
Meri qismat mein duniya ke gham ho gaye
Kya kahu’n mujh pe kya kya sitam ho gaye
Ran mein ammu ke shane qalam ho gaye
Mere kano se chini gayi’n Baliya’n
Payas se jal rahi hai meri haddiya’n
Nam zami’n mein……..
(7)
Meri rudad sun lo zabani meri
Khushk mashkiza hai bas nishani meri
Aansuo’n se bhari hai kahani meri
Jaan le legi tashna dahani meri
Lab hain chatkhe hue or sukhi zaba’n
Payas se jal rahi hai meri haddiya’n
Nam zami’n mein……
(8)
Kya kahu’n mushkile’n kufa o sham ki
Har aziyat hai shayad mere naam ki
Ek tasveer hoon ranjo alaam ki
Koi surat nahi mere aram ki
Hai meri pusht par sayeliyo’n ke nish’n
Payas se jal rahi hai meri haddiya’n
Nam zami’n mein……
(9)
Roko Mahfooz o fakhri Baya’n or qalam
Shiddat e gham se guthta hai sine mein dam
Dil mein taqat nahi ab khuda ki qasam
Ho Baya’n kaise bali sakeena ka gham
Bas tasauur se hote hain aansu Rawa’n
Payas se jal rahi hai meri haddiya’n
Nam zami’n mein……