sehra lahu lahu hai

bikhre parhe hain laashe sehra lahu lahu hai

dashte bala me sheh ka sajda lahu lahu hai

lashkar yazidiyon ka pal me jalaa raha hai

mehboob e kibriya ka wo dil dukha raha hai

insaaniyat ka dekho tchehra lahu lahu hai

bikhre parhe hainn laashe sehra lahu lahu hai

shehzaadiyaan falak ki qaidi bani huwi hain

aur tchaadaren saron se inke tchhini huwi hain

baparda bibiyon ka parda lahu lahu hai

bikhre parhe hain laashe sehra lahu lahu hai

jis dam kate the baazu abbase ba haya ke

mashk o alam lahu me dube the baawafa ke

pyaaon ki tishnagi par darya lahu lahu hai

bikhre parhe hain laashe sehra lahu lahu hai

ek shab ki jo biyaa thi deti rahi duhaayi

kaisi khushi mili jo ek pal na raas aayi

qaasim ka haay ran me sehra lahu lahu hai

bikhre parhe hain laashe sehra lahu lahu hai

jab ran me aaye haidar har bibi thi hazina

kehti thi dada jaan se ro ro ke ye sakina

tsipka huwa badan se kurta lahu lahu hai

bikhre parhe hain laashe sehra lahu lahu hai

ye tchikhti fazaayen deti hain ye sadaayen

hai khaak o khun ki sar par saadaat ke ridaayen

aulade mustafa ka rutba lahu lahu hai

bikhre parhe hain laashe sehra lahu lahu hai

dushvaar raaste hain manzil kathan hai saari

zakhmon se naatawaan ke taaza lahu hai jaari

karbal se shaam tak ka rasta lahu lahu hai

bikhre parhe hain laashe sehra lahu lahu hai