Hai Khaufnaak Raat Qayamat Ka Waqt Hai
Zahra Ke Laadlo Pe Ye Ghurbat Ka Waqt Hai
Mushkil Kusha Pe Aaj Museebat Ka Waqt Hai
Ye Fatima Ki Aakhri Rukhsat Ka Waqt Hai
Deedaar Aakhri Hai Ye Binte Rasool Ka
Taiyyar Dafan Ko Hai Janaza Batool Ka
Zahra Ki Qabr Khod Rahe Hain Abutarab
Tharra Rahe Hain Haath, Jigar Mein Nahi Hai Taab
Chehre Pe Apne Dhale Hue Sabr Ka Hijaab
Karte Hain Baar-Baar Ye Hasnain Se Khitaab
Maa Ki Taraf Ka Pyaar Bhi Tum Humse Le Jiye
Baba Tumhare Saath Hai, Tum Gham Na Ki Jiye
Taiyyar Karke Qabr Ali Ne Kaha Utho
Aye Mere Laadlo, Utho Baba Ka Saath Do
Turbat Ki Samt Maa Ke Janaze Ko Le Chalo
Dil Thaam Ke Namaze Janaza Ada Karo
Ho Waqte Dafan Itni Kam Aawaaz Bain Ki
Dushman Talak Na Jaaye Sada Shoro Shain Ki
Turbat Ke Paas Mayyat-e-Zahra Rakhi Gayi
Aur Kar Chuke Namaze Janaza Ada Ali
Rukh Se Kafan Hata Ke Sada Murtaza Ne Di
Madar Ka Aan Ke Karo Deedaar Aakhri
Us Dam Bade Pisar Ka Jigar Gham Se Phat Gaya
Chhota Pisar To Daud Ke Maa Se Lipat Gaya
Mayyat Se Phir Ali Ne Pisar Ko Juda Kiya
Beton Ko Murtaza Ne Gale Se Laga Liya
Kehne Lage Ki Sabr Tumhein Dega Kibriya
Lo Waqt Aa Gaya Hai Ab Amma Se Ho Vida
Mujhko Hai Naaz Mere Dulaaron Ke Sabr Par
Mitti Bhi Daalna Hai Abhi Tumko Qabr Par
Ye Sunke Fatima Ke Dulare Tadap Gaye
Rote Hue Ye Kehne Lage Baba Jaan Se
Ek Pal Bhi Apni Maa Ke Bina Hum Nahi Jiye
Dil Ko Qaraar Aata Tha Ammaa Ko Dekh Ke
Baba Batao Khud Sambhalen Ge Kis Tarah
Mitti Hum Unki Qabr Pe Daalenge Kis Tarah
Bechain Dil Ko Dard Se Ek Pal Na Thi Nijaat
Kaise Karein Supurde Lahad Apni Kaaynaat
Tharra Rahe The Qalb Se Khaybar Shikan Ke Haath
Mayyat Sambhalne Mein Hasan De Rahe The Saath
Aane Lagi Lahad Se Sada Ye Rasool Ki
De Do Pedar Ke Haath Mein Mayyat Batool Ki
Turbat Mein Fatima Ke Janaze Ko Jab Rakha
Muh Ko Chhupa Ke Roey Bahut Der Murtaza
Rokar Kaha Ali Ne, Aye Sarkare Ambiya
Ummat Ne Fatima Pe Bada Zulm Kar Diya
Saupa Tha Mujhko Aap Ne Jo Haath Ya Nabi
Toda Gaya Batool Ka Woh Haath Ya Nabi
Thama Tha Jab Ye Haath To Saleem Thin Ungliyan
Rukhsaar Par Nahi The Tamachon Ke Ye Nishaan
Tooti Nahi Thi Fatima Zahra Ki Pasliyan
Aati Hai Mujhko Sharm Aye Sultane Do Jahaan
Bheja Tha Ek Pedar Ne Bana Kar Dulhan Ise
Wapas Main Kar Raha Hoon, Pinha Kar Kafan Ise
Talqeen Murtaza Ne Padhi Dil Ko Thaam Ke
Aur Phir Pisar Ka Lekar Sahara Khade Hue
Takhta Hasan Ne Jaise Rakha Maa Ki Qabr Pe
Turbat Pe Badh Ke Khud Ko Giraya Hussain Ne
Kehne Lage Ki Sabr Mujhe Deke Jaiye
Maa Ke Baghair Jeete Hain Kaise Bataiye
Zahra Ko Jab Ali Ne Lahad Mein Chhupa Diya
Turbat Se Fatima Ki Ye Aane Lagi Sada
Jao Ke Intezar Hai Zainab Ko Aap Ka
Ghurbat Ka Aye Nadeem Woh Manzar Ajeeb Tha
Aansoo Pedar Ke Pochh Rahe The Hasan Hussain
Ghar Tak Gaye Hain Rote Hue Fathe Hunain