madina hota hai suna hussain jate hain

fiza me gunja ye nauha hussain jate hain

1. ye sun ke fatema sugra ko aisi thes lagi

tadap ke apni gareebi pa wo bohat roi

ke mujh ko chhod ke baba hussain jate hain

2. yu'n ro ke hum ko rulao na aye meri dukhtar

mila jo mauqa to lene ko aayenge akbar

ye usko de ke dilasa hussain jate hain

3. chale jo akhri rukhsat ko maa ki turbat pe

qadam badha nahi paye to ghutniyo chal ke

qareeb e marqade zehra hussain jate hain

4. nibhane sath shahe dee ka aai hain zainab

aur apne sath me baccho ko layi hain zainab

suna jo behna ne bhaiya hussain jate hain

5. khutoot likh ke bulaya gaya hai kufe se

chale hai sibte payember haram ko sath liye

bachane deen e khuda ka hussain jate hain

6. har ek ko sinr se apne lagaya ro ro kar

phir hath rakh ke rasool e khuda ki turbat par

pukari hazrat e salma hussain jate hain

7. kiya tha ahed jo bachpan me apne nana se

me apna ghar bhi luta dunga deen e haq ke liye

nibhane aaj wo wada hussain jate hain

8. jo dil me ranjo alam hai bhala kahe kaise

ye baat kum to nahi hai koi qayamat se

nabi ka chhod ke roza hussain jate hain

9. haram ki hurmato azmat na aaye khatre me

kiya ye soch ke tabdeel hajj ko umre me

bacha ke hurmat e kaba hussain jate hain

10. bayan kaise ho "arman" kaisa manzar tha

laraz raha tha khuda ke rasool ka rouza

ye shor jab hua bar pa hussain jate hain